Barkada ni Pedro – your online prayer barkada

PANGUTANA:

      Bro. Soc, ang mga Traditionalist miingon nga sila mao ang mga matuod nga Catolico kay matud pa nila sila mao ang nagpabilin sa matuod og orihinal nga Misa, ang Misa Tredentina, Latin Mass. Ug matud pa nila nga ang nagmisa og dili Latin Mass eskumulgado, bisan pa ang inyong Papa karon nga nagmisa ug dili Latin, mga arsobispo, Obispo ug mga pari lakip na ang mga Catolico nga nanimba sa dili Latin Mass, eskumulgado. Siya mikutlo sa Balaod ni Papa Pio V sa Quo Primum, “Gipahiuli ug nadiskobrehan niya nga ang Misa nga Latin mao ang orihinal diha sa Substance ug Rite. Ang mga Cardinal, mga administrador nga nagdumili, kon magmisa sa laing pinulongan, sila mga excommunicated. Ug kining maong Misa Tredentina magpadayon nga walay katapusan.” Husto ba ang pagpasabot sa mga Traditionalist? (Carlos Pastorite, San Isidro, Talisay City, Cebu).

TUBAG:

Ang gipasabot ni Papa Pio V mao ang Roman Rite, inagda sa Concilio sa Trento 1545 A.D. gibaod niya nga tumanon ang Misa nga Latin, sa Roman Rite mao kini ang matud pa niya orihinal. Pero, ang matuod nga ang Iglesya nga gitukod ni Cristo sa Jerusalem, sakop sa Eastern Rite, mao gayud ang Orihinal kun Sinugdan sa Misa. Si Cristo nagmisa sa pinulongan nga Aramaic, dili Latin ug ang balaod ni Papa Pio V alang lang sa mga nasud nga ubos sa Roman Rite. Siya miingon sa Quo Primum, “Alang sa mga nasud nga Catolico nga nagsugod sa ilang Misa sa ilang kaugalingong pinulongan nga mikabat na og labing menos 200 ka tuig, magpadayon sila sa pagmisa ginamit ang ilang kaugalingong pinulongan.” Ang baod ni Pio V dili alang sa pagpatuman sa tibuok kalibutan.

Dinhi makita nato, nga ang pinulongan nga gamiton sa Misa, dili Dogmatic kondili gayud mausab. Kay usa sa kinaiya sa pagka Dogma sa usa ka doktrina ug sa pagbansay nga kini tulomanon alang sa tanang Catolico sa kalibutan. Ang definition sa Dogma mao kini: “Fide Divina et catolica ea omnia credenta sunt, quae in verbo Dei scripto vel taditio continentur et ab Ecclesia sive solemni judicio sive ordinario et universali magisterio tamquam divinitus revelata credenda proponuntur.” Kini nagpasabot: Kining tanang mga butang nga gipatuhoan nga Langitnon ug Catolico nga pagtuo nga gipasukad sa pulong sa Dios, nahasulat o sa tradisyon nga gipatuman sa atong Catolico nga pagtuo sa solemning pagpadayag sa naandan o sa kagahoman sa pagpatudlo sa tibuok kalibotan, (Fundamentals of the Catholic Dogma pahina 4).

Ang atong Papa nga dunay otoridad gikan ni Cristo, mao ang makapadayag sa unsa nga doktrina nga mausab ug dili mausab (Catechism of the Catholic Church No. 2034).

Si Papa Pablo VI inagda sa Conciliar Teachings gikan sa mga kaobispohan mipadayag niini: “Ang pinulongan nga gamiton sa Misa dili Dogma, kondili mausab. Busa may kausaban diha sa Misa sa bahin nga mausab. Mahimo nga ang Misa sa Iglesya Catolica ang paggamit sa pinulongan sa mga tawo. Apan dili pinulongan lang sa mga tawo kondili sa Latin usab. Mao nga gipiho kini nga ang Latin nga Misa mahimong gamiton sa mga Pari. Apan mahimo usab ang pinulongan sa katawhan” (Canon No. 928, Secro Sanctum Concilium, par. 36). Busa sayop ang panudlo sa mga “Traditionalists”. Giputol nila ang panudlo ni Papa Pio V.

1 Mga Hari 19:4-8

“Ang Panaw ni Propeta Elias”

Ang atong unang pagbasa karong Domingoha usa ka mahinungdanon nga paglarawan sa usa ka yugto sa kinabuhi ni Propeta Elias: ang iyang panaw padulong sa Horeb, ang Balaang Bukid sa Dios. (Mahinungdanon usab nga niining tungora angay natong masayran nga kining Horeb mao ang linain nga ngalan sa Sinai.)

Kining maong yugto sa kinabuhi ni Propeta Elias masabtan lamang diha sa pagdugtong niini sa dakong kahadlok nga iyang gibati tungod kay gigukod ug gilutos siya ni Haring Ahab ug sa asawa niini nga si Rayna Jezebel nga usa ka pagano. Buot lamang ni Propeta Elias nga luwason ang iyang kaugalingong kinabuhi, ug busa miikyas siya ug mipalayo. Ug kining maong panaw usa ka paagi aron maluwas niya ang kaugalingon.

Apan kining maong panaw padulong diay ngadto sa usa ka paghimamat sa Dios. Kining maong yugto maoy sunod nga bahin sa langkob sa atong pagbasa karon nga gilatid diha sa vv9-18.

Mahitungod niining maong panaw, adunay mabulukong mensahe kini alang kanatong tanan nga mga magtutuo. Tungod kay ang atong Cristohanong Kinabuhi  usa man ka Panaw sa Pagtuo, haum kini alang sa atong padayon nga pagpamalandong sa atong Cristohanong Kaakohan diha sa atong kaugalingong panaw sa pagtuo – tinagsa o hini-usa man.

Usa  ka kamatuoran diha sa atong kasinati-an diha sa pagpuyo sa atong cristohanong kinabuhi mao ang KAHADLOK. Sama sa gipakita nga kahadlok ni Propeta Elias, aduna usab kitay mga kahadlok ug pag-ukon-ukon. Aduna kitay gilikayan nga mga hitabo, kasinati-an ug mga tawo. Buot lamang natong makalingkawas gikan sa dugang pa nga mga kasamok ug kakuli-an, mao nga mopalayo kita. Ug buot lamang nato nga makabaton og kalinaw.

Apan kanunay kini nga magsunod-sunod kanato nga daw anino. Tungod niini ato na lamang ikatulog aron mahikalimtan, apan usahay mohamok gihapon sila pinaagi sa handurawan o sa damgo o dili man gani sa urom. Wala kitay laing mahimo kon dili ang pag-atubang ug pagharong niining atong mga gikahadlokan ug gilikayan nga mga kaaway ug kakuli-an.

Mao nga sa sabakan niining maong kamatuoran, atong mapamatud-an nga ang panaw ni Propeta Elias ato usab nga panaw. Ug labaw sa tanan, kining maong atong panaw tipik sa atong pagpuyo sa mga mithi sa cristohanong pagtuo diin ang presensya  lamang  sa  Dios  maoy  makahatag  kanato  og  kahupa-yan ug kadasig, kaisog ug katakus sa pagpadayon uban sa atong mga  kaigsuonan nga susama usab kanato og kasinati-an sa kinabuhi.

Kining maong diosnong presensya makaplagan lamang diha sa pag-ampo ug diha sa sabakan sa Eyukaristiya. Mao kini ang maghatag  kanatog  kusog  sa  pagsagubang  sa  atong  kahadlok  ug sa mga kakuli-an nga atong masinati diha sa atong panaw sa kinabuhi.

Hinaut unta nga hatagan gayud nato sa maong importansya o kabililhon ang pag-ampo – ang pag-ugmad ug pagpuyo niini – ug ang Santos nga Eyukaristiya – dili lamang sa usa ka buhi nga kasa-ulogan, apan labaw sa tanan sa pagkinabuhi niini diha sa paglugdang sa atong kinabuhi sa sabakan sa Pulong sa Kinabuhi ug sa pagtagamtam sa Pan sa Kinabuhi nga maoy tuboran sa atong lawasnon ug kalagnon o espirituhanon nga kusog aron kita makapadayon diha sa atong Panaw sa Pagtuo.  Amen!

Temporaryo ang kadaugan sa kadautan

Dinhi ning kalibutan nga gipahulaman kanato sa Labawng Magbubuhat, in many instances, magmalampuson ang mga tinguha sa dautan. Maoy hinungdan nga naglisud kita pagpuo sa corruption.

Kini tungod kay sa atong pagtan-aw, nagmalampuson silang mga dautan sa ilang pagpuyo ning kalibutan… materially speaking. Kon ang atong sukod sa paglampos mao ang mga butang material nga maangkon sa tawo, regardless, unsa ang iyang pagkatawo, daghan kaayo ang nagmalampuson gumikan sa dautan nilang binuhatan.

Unya, ang mga nagbinuotan, ang nagtinarong nga nagpabiling walay kabtangan, makapangutana sa ilang kaugalingon ngano nga nagpabilin silang kabus nga nagbinuotan man unta sila.

Gumikan niini makalimot ang tawo nga temporaryo ang tanan ning kalibutan… nga ang hingpit ug dili matukib nga gasa sa atong pagtinarong, dili nato maangkon ning kalibutana, kaylagi, lumalabay lang ang tanan dinhi.

Apan, kining pag-triumph sa evil ning kalibutan, adunay linugdangan. Sa atong mga panghitabo karon, daghan na sa atong mga igsoon nga konuhay nagmalampuson kay nakatigom nag daghan kaayong kwarta, apan karon, nagsugod nag bayad sa ilang mga utang gumikan sa dautan nilang binuhatan.

Maayo na lang kon anhi kita dinhi pabayra sa atong mga utang, kay sa adto na unya sa giingon nga “blazing furnace.”

Hinumdomi nga ang kaayo sa Ginoo alang sa tanan, sama nga ang pagsidlak sa adlaw alang kanatong tanan, ma-dautan o ma-maayo. Ang ulan alang sa tanan, ma-bungang kahoy o ma-sagbot. Kahinumdom mo sa parable of the weeds in the field?  Miingon ang Ginoo:

“The one who sows the good seed is the Son of Man. The field is the world; the good seed are the people of the Kingdom; the weeds (ang mga sagbut) are those who follow the evil one. The enemy who sows them is the devil. The harvest is the end of time and the workers are the angels.

“Just as the weeds are pulled up and burned in the fire, so will it be at the end of time. The Son of Man will send His angels, and they weed out of his kingdom all that is scandalous and all who do evil. And these will be thrown in the blazing furnace, where there will be weeping and gnashing of teeth. Then the just will shine like the sun in the kingdom of their Father”

At the end of time, kinsa man ang ma-pulled up and burned in the fire, ug kinsa man ang mo-shine like the sun in the kingdom of their Father … ang mga Pro-RH Bill ba, o ang mga Anti-RH Bill?   

Giandam sa BEC Secretariat

Agosto 19, 2012

IKAKAWHAAN NGA DOMINGO SA

ORDINARYONG PANAHON

TEMA:  “ANG AKONG KARNE TINUOD NGA KALAN-ON

UG ANG AKONG DUGO TINUOD NGA ILIMNON”

1.  Pasiuna sa Ebanghelyo:

Gipakita  sa Ebanghelyo nga wala masabti si Jesus sa Iyang  gipamulong  mao  nga  gisalikway  Siya.  Angayng masayran  nga  niadtong  panahona  maoy  naandan  sa  mga Judio  ang  paghimog  “relihiyosong  kombira”  diin  ilang  kan-on ang karne sa mananap nga gisakripisyo sa Templo.

2.  Pagbasa, Pagpaminaw, Pagpamalandong sa  Pulong sa Dios:

     (Kalambigitan sa Kinabuhi ug sa Pulong sa Dios)

Unang Pagbasa              :    Panultihon 9:1-6

Ikaduhang Pagbasa       :    Efeso 5:15-20

Ebanghelyo                    :    Juan 6:51-58

3.  Kahilum (Paghatag og higayon nga ang Ginoo mosulti kanato):

Mga pangutana isip giya sa pamalandong ug paambitay:

a)   Unsay pulong o mga pulong ang nakatandog kanako  sa maong Ebanghelyo?  Ngano man?

b)    Unsay mensahe niini para kanako nga akong ikapaambit sa akong mga kaubanan sa BEC selda?

4.  Pag-inambitay (Hatagan og higayon ang matag-usa sa pag-paambit sa ilang kasinatian sumala sa Ebanghelyo nga gibasa):

5.  Lihok-Sulbad (Pagahimoon human sa paambitay):

     Pag-estorya ug unsa ang mga buluhaton nga himoon:

a)    Pagtaho sa miagi nga buluhaton.

b)    Unsay bag-ong buluhaton nga himoon?

6.  Kinabuhi ug Pagtulon-an sa Simbahan

           (Basahon human sa paambitay):

Ang mga Sakramento nga atong madawat magtabang nato paghingkod diha sa kinabuhi sa Dios; makatuhop kini sa kina-uyokan sa atong pagkatawo. Usahay dali ra tang mabugnaw ug mahugno kay wala may kausaban nga mamatikdan sa atong kaugalingon sa kanunayng pagdawat nato sa mga sakramento. Angayng masayran nga ang kabag-ohan naa sa kahiladman, busa dili dayon mamatikdan.

Si Jesus buhing pan dinhi nato. Dihang mokaon kitag ordinaryong pan hilison kini ug mahimong kabahin sa atong lawas. Sa samang paagi, dihang mokaon kita sa buhing pan, nga mao ang lawas ni Cristo, mosulod Siya kanato aron kita mabag-o ug maghiusa diha Niya. Niining paagiha ang Iyang mga mithi, bili ug baruganan mahimo nang atoa, sa ingon nga magkinabuhi kita pareho sa Iyang pagkinabuhi, mo-alagad ta pareho sa Iyang pag-alagad ug mahiusa uban sa Iyang panglantaw ug misyon.

7.  Pangamuyo:  (tanan)

Pasidunggan ko kanunay ang Ginoo,

Ang akong ngabil kanunayng magdayeg Kaniya.  Amen