YOUTH MATTERS

Wanted: 1,500 Youth Ushers ug Usherettes

Pipila nalang ka adlaw gikan sa akong pagsulat niini, ipahigayon na ang konsyerto’ng ‘Breaking the Silence,” nga gipasiugdahan sa mga batan-on nga sakop sa District 8, ang “FUEL,” kon Family of United & Empowered Leaders.  Usa kini ka Praise & Worship Concert alang sa usa ka kawsa, nga adto himoon sa Blessed John Paul XXIII Seminary Football Fields, sa Mabolo, Dakbayan sa Sugbo.

Ug kay sa Hulyo 28, adlaw’ng Sabado man kini gihimo, nan nahuman na kini karon, ilabi na kon nabasa mo kini sa adlaw’ng Dominggo.  Busa, congratulations nalang sa mga nagpasiugda niini, nga gipangulohan ni Jessilou ug ni Padre Kit Sestoso.

Laing kalihokan, nga hapit kitang tanan apil sa pagpangandam ug pagsaulog, mao ang umaabot nga National Thanksgiving Mass nga himoon sa Nobiyembre 30, 2012.  Misa –pasalamat kini tungod sa dakong grasya nga gipaambit sa Dios pinaagi sa pagkasantos unya ni Beato Pedro Calungsod.

Ug bisan ubay-ubay kanato ang moapil sa Canonization Rites didto sa Roma, Italya, karong Oktobre baynte-uno, nagkapuliki na karon ang mga Cebuano sa pagpangandam sa Thanksgiving Mass didto sa SRP, dakbayan sa Sugbo.  Meeting didto, meeting diri, aron maandam ang tanan sa dili pa moabot ang gipangandaman.

Kami sa Commission on Youth gisangonan sa pag-atiman sa Committee on Reception.  Busa kami ang moatubang ug motagbo sa mga bisita, ilabi na ang mga Obispo gikan sa tibuok ug gawas sa nasud.  Adto kami mag-atang sa Arrival Area ug VIP lounge sa domestic ug international airports.  Hahaha!

Gani, nangandam na si Krishna ug Jessa sa ilang isul-ob aron kuno mura sila’g mga stewardees inig tagbo.  Ug ilang gitambagan si Edna nga magsul-ob og six-inches nga sandals aron makaabot sa height nga gikinahanglan nila.  Toink!

Nagtuo si Marie nga wala na siyay problema, apan maisogong ni-demand si Edna nga kinahanglan walay ‘swine’ nga paapilon nga motagbo sa mga bisita.  Mao nga sugod karon, si Marie nag-diet na.  Dili na kono siya mokao’g ‘magnum’ ug tam-is ug halang nga ilimnon.

Tungod niining pagpangandam, nanawagan kami sa mga batan-on nga buot mo-volunteer sa pagka-usher ug usherettes.  Nagkinahanglan  kami karon og usa ka libo ug kinyentos (1,500) ka mga youth volunteers alang sa ushering.

Ang usa ka libo (1,000) niining youth volunteers maoy modala sa mga payong nga gamiton atol unya sa National Thanksgiving Mass.  Usa kini ka dakong prebelihiyo alang sa mga batan-on nga makaapil niining makasaysayanong kalihokan sa Simbahan sa Sugbo, agig pagpasidungog ni “San Pedro.”

Alang sa mga interesado’ng moapil, mamahimo kamong motawag sa atong COY office-253-0173 ug Archdiocesan Youth Center-520-5234 alang sa detalye ug parehistro.  Mas dalaygon gayud unta kon hisgotan kini sa inyong youth meetings sa parokya (PYCC), bikaryato (VYCC) ug sa distrito (DYCC) aron magdungan kamo sa pagparehistro.

“First come, first serve” ang atong sundon nga proseso kay limitado ra ba ang gidaghanon sa makaapil ug ang gikinahanglan  namo.  Busa ayaw pagdugay sa pagparehistro kay ang deadline gitakda na sa Agosto traynta-y-uno (August 31).  See you soon!

Donation for the Archdiocesan Youth Center:

Coinbank #221 – Holy Spirit Adoration Sisters

(Pink Sisters)                                   – Php18,375.00