PERSPEKTIBO

Amos 7:12-15

“Propesiya: Usa ka Propisyon?”

Ang atong unang pagbasa karong Domingoha nagpahiluna kanato diha sa usa ka hitabo sa kinabuhi ug ministeryo ni Propeta Amos, usa ka taga-habagatang propeta nga nagsangyaw sa mensahe sa Dios ngadto sa amihanang gingharian sa Israel. Niining maong yugto nga gilarawan karon sa langkob sa pagbasa, si Amos gibuyag ni Amasias (vv12-13), ang pari sa sanktuwaryo sa Bethel, ug gimando-an  sa  pagpa-uli  balik sa ilahang dapit aron didto na lang mohimo sa iyang pagsangayaw og mga propesiya.

Sa maong panagbaylo-ay og mga pulong tali kang Amasias (vv12-13) ug Amos (vv14-15), molutaw ang usa ka lugas sa pagsabot mahitungod sa PROPESIYA ilabi na diha sa habig ni Amasias, nga usa kini ka propisyon, ug nga sa maong iyang pagsabot, si Amos nagpabayad aron molitok og propesiya. Sa pagkatinu-od, aduna gayoy mga propeta o propetanhong mga tawo nga bayran sa ilang paghimog propesiya (sa iningles, “prophet-for-hire”).

Mao nga gitubag kini ni Amos pinaagi sa pagbutyag kon kinsa ug unsa gayud siya sa pagka-tinuod – nga dili siya usa ka bayaran nga propeta. Kay gikan sa iyang pagka-magbalantayg mga karnero ug tigpul-ong og mga sikomoro gitawag siya sa Ginoo aron pagsangyaw sa Iyang mensahe ngadto sa Gingharian sa Aminahan, ang Israel. Busa tataw kaayo nga ang pagka-propeta ni Amos usa ka TAWAG, usa ka BOKASYON, ug busa dili usa ka propisyon!

Apan, aduna pa gayoy usa ka tipik ang PROPESIYA nga angay natong tutokan: ang pagsangyaw o pagpahayag o pagmantala sa mensahe. Mao kini ang lintunganay nga kina-iya sa PROPESIYA. Kon ato kining dad-on diha sa wanang sa PAGTUO nga kinahanglan usab nga isangyaw, barogan, puy-an ug imantala, nan aduna kitay pulong nga haum kaayo niining maong katuyo-an: PROPISYON nga gikan sa iningles nga “profession” kansang kahulogan mao ang pagpahayag ug pagpadayag.

Mao nga ang pag-”profess” sa PAGTUO usa diay ka wanang sa pagkinabuhi – apan dili panginabuhi-an. Dinhi niining maong wanang ipadayag ang pagkinabuhi ug isangyaw ang gipuy-an ug buhing PAGTUO. Dinhi masulod ang pagsabot nga mabuhi, magkinabuhi ug magpakabuhi kita diha sa PAGTUO. Ug busa kon dili nato i-”profess” ang atong PAGTUO hayan nga magkahinay ang pinitik sa kinabuhi diha sa maong PAGTUO ug busa magkahinay kita og kamatay, sama nga kon ang usa ka PROPISYON nga naghatag og panginabuhi-an sa usa ka propisyonal dili pagahimuon walay kaayohan ang dangatan.

Hinaut unta nga dinhi niining maong sugyot sa pagsabot ug pagkalawat sa atong misyon ug buluhaton sa pagpropesiya kun pagsangyaw sa mensahe sa kaluwasan sa tanang matang sa panahon ug kahigayonan, kita makakaplag sa igong kadasig ug paglamdag gikan sa Espiritu Santo aron magma-isugon kitang mopadayon sa maong balaang tahas ug magmakusganon diha sa atong adlaw-adlaw nga pagpakigbisog ug pagpakigharong sa mga gahum nga buot mopahilom, mopakgang ug mopatay sa mensahe sa kinabuhi, sa Maayong Balita sa Kaluwasan.  Amen!