PERSPEKTIBO

Jeremias 23:1-6

“PAGDU-AW”

Ang atong unang pagbasa karong Domingoha usa sa mga maanindot kaayo nga yugto sa kasaysayan sa propesiya. Kini tungod kay dinhi niining maong wanang sa mensahe makaplagan ang tuboran sa lintunganay nga kahulogan sa paglarawan sa Ginoo isip Maayong Magbalantay sa mga Karnero.

Sa samang paagi, dinhi usab gipahiluna ang hanig alang sa pagsabot sa kinatibuk-ang paglarawan diha sa atong ebanghelyo karon: ang pagpadala sa mga tinun-an ni Jesus ngadto sa katawhan isip Iyang mga representante (tan-awa ang Markos 6:7-13) – diha sa ilang misyon isip mga “pinadala”, isip mga hulip Kaniya nga tig-atiman sa katawhan sumala ug sigo sa larawan sa usa ka Maayong Magbalantay sa mga Karnero.

Sa pagtan-aw sa kinatibuk-ang larawan ato usab nga makita ang anggulo sa mensahe mahitungod sa PAGDU-AW o pagbisita sa Dios diha sa v2. Sa duha ka higayon nga gilitok kining maong pulong sa PAGDU-AW – sa unang higayon diha sa negatibo nga paagi: “wala ninyo sila du-awa”, ug sa ikaduhang higayon sa positibo nga pagpahayag isip paapas-sumpay: “akong padu-awon dinha kaninyo ang kada-utan ang inyong mga binuhatan” – atong makaplagan ang duha ka mga kahulogan sa maong pulong nga PAGDU-AW.

Ang unang kahulogan o buot ipasabot mao ang lintunganay nga pagbisita o PAGDU-AW apan adunay langkob nga PAG-ATIMAN. Sa laing bahin, diha sa ikaduhang kahulogan ang PAGDU-AW adunay pwersa sa PAGPAHAMTANG OG SILOT. Sa pagkatinuod mao gayud kini ang duha ka wanang o nawong sa kahulogan sa PAGDU-AW, nga sa hinebreyo mao ang PAQAD kansang positibong habig mao ang “kaluwasan” samtang ang negatibong habig mao ang “silot”. Kining duha ka mga wanang o habig maoy kinatibuk-ang langkob sa DIOSNONG PAGHUKOM.

Kining maong pulonga, PAQAD kun PAGDU-AW, mao usab ang samang pulong nga gigamit sa mga “hampak” (plagues) nga gipahamtang sa Ginoong Dios ngadto sa mga Ehiptohanon diha sa Exodus 7-11. Nga diha sa maong paglarawan atong makita ang duha ka habig sa paghukom: ang pagluwas sa katawhan sa Israel sa usa ka bahin ug ang pagsilot sa mga Ehiptohanon sa pikas bahin. Apan sa kinatibuk-ang paggamit sa maong pulong, ang PAGDU-AW o pagbisita kanunay nga magpahayag sa “kaluwasan” alang sa Iyang piniling katawhan. Dayag kini kaayo diha usab sa awit ni Zacarias, Lukas 1:68-79, ilabi na dinha sa v68.

Sa laktod, ang pwersa sa mensahe nga giluwatan ni Propeta Jeremias diha mismo sa v2 usa diay ka PAGHUKOM. Gihukman sa Ginoo ang mga piniyalang magbalantay sa mga karnero nga wala magpakabana ug mag-atiman sa ilang panon.

Sa atong kinabuhi – indibidwal o katilingbanon man – adunay daghang mga kahigayonan nga ang Dios modu-aw o midu-aw na kanato. Mao kini ang mga yugto diin atong masinati ang Iyang Balaang Presensya diha sa atong mga maayong buhat, mga mahinungdanong desisyon alang sa kaayohan, sa atong mga kaila, sa mga suliran ug hagit, ug uban pang mga kahigayonan.

Hinaut unta nga kanunay kitang magma-amguhon niining mga talagsaon ug yanong mga kahigayonan aron atong matubag ang maong PAGDU-AW pinaagi sa pagkamapasalamaton ug matu-uhong pagka-maabi-abihon.  Amen!