Perspektibo

2 Mga Hari 4:42-44

“Ang Katuyo-an sa Katingalahang Buhat”

Ang atong unang pagbasa karong Domingoha usa ka haum gayud kaayo nga hanig alang sa atong ebanghelyo niini usab nga Domingo. Mao kini ang pagpadaghan sa pan nga gihimo ni Propeta Eliseo: ang kawhaan (20) ka mga pan nakapaka-on sa usa ka gatos (100) ka mga tawo.

Sa talagsaong kinaiya dinha sa wanang sa propesiya, kining maong paglarawan diha sa atong pagbasa usa lamang sa ubay-ubay nga mga yugto diin ang propeta makahimo og buhat nga katingalahan kun milagro. Mao kini karon ang atong hatagan og pagtagad sa atong pagtuki ug pagpamalandong karon, uban sa katuyo-an nga mapalawig o mapalapdan nato ang atong pagsabot sa gibuhat ni Jesus diha sa ebanghelyo karon usab nga Domingoha nga mao ang paglarawan ni San Juan sa pagpakaon ni Jesus sa bagang panon sa katawhan (Juan 6:1-15).

Niining maong wanang sa panlantaw, gipakita nga ang mga propeta sa kanhiayng panahon dili lamang ang pagsulti sa mensahe maoy ilang buluhaton. Ang ilang pulong ug mensahe paga-ubanan usab og katingalahang buhat. Apan usahay, walay pulong ang ibungat. Katingalahang buhat lamang maoy magpadayag ug magpahayag sa mensahe.

Tungod niini, ang mga propeta nailhan nga gamhanan o ginamhan sa Makagagahum. Mao nga sama sa pagpa-ila sa propeta diha sa v42, gitawag siya og “tawo sa Dios” (“man of God”) nga adunay kahulogan usab isip “sulugoon sa Dios”.

Dugang pa gayud, ang gipadayag diha sa katingalahang buhat adunay lintunganay nga katuyo-an sa pagpahimug-at nga ang Dios mao gayud ang nagbuhat sa maong katingalahan alang sa katawhan aron maka-ila sila Kaniya, ug nga sa ilang pagka-ila sa Dios mapaladman ang ilang pagtuo ug pagsalig Kaniya. Kini tungod kay pinaagi niining maong katingalahang buhat ikatisok ang pagsalig ug pagtuo sa katawhan diha sa kamatuoran nga ang Dios kanunay nga nagpakabana ug hangtod sa hangtod magpakabana gayud ngadto sa Iyang piniling katawhan. Ang gikinahanglan lamang mao ang pagka-bukas niining maong mga pagpadayag diha sa buhat pinaagi sa propeta isip instrumento sa Dios.

Usa sa mga mahinungdanon nga kahulogan sa PAGTUO diha sa wanang sa Balaang Kasulatan mao ang “pagbutang sa kaugalingon diha sa pagsalig sa makaluluwas ug mga katingalahang buhat sa Dios sa mga nanglabayng panahon”. Mao kini ang Pagtuo ni Abraham. Ug sa ingon, ang mga katingalahang buhat sa propeta o mga propeta aduna diay katuyo-an sa pagpukaw diha sa katawhan sa ilang Pagtuo diha sa Dios ug sa Iyang pagkamatinud-anon diha ug pinaagi sa Pulong ug Buhat.

Mao usab kini ang katuyo-an sa mga buhat ni Jesus: ang pagpukaw sa Pagtuo ngadto sa Dios pinaagi Kaniya, ang Bugtong Anak sa Dios. Ug ang atong pagdawat Kaniya maoy ganghaan sa maong diosnong kahilambigitan ug pagpakighilambigit, ug alang usab sa atong pagpakig-hilambigitay.

Hinaut unta nga diha sa Eyukaristiya mapatunhay ug mapaladman sa kanunay ang atong Cristohanong Pagtuo ug ang atong Panaghilambigitay pinaagi Kaniya ug uban Kaniya ug diha Kaniya. Amen!