PERSPEKTIBO

Exodo 20:1-3,7-8,12-17

“Napulo ka mga Pulong”

Ang atong unang pagbasa karon niining ika-tulong Domingo sa Kwaresma sa Siklo B sa mga pagbasa sa Liturhiya naglangkob sa bersiyon sa Napulo ka Sugo o DECALOGO diha sa libro sa Exodo, kay aduna man usab bersiyon niini diha sa libro sa Deuteronomio 5:6-21. Mahitungod sa mga tudling nga gilak-angan, kini sila mga lugway o dugang nga pagpasabot sa unang sugo (vv4-6) ug sa ika-tulong sugo (vv9-11).

Kon atong tan-awon pag-ayo kining maong listahan ug itandi sa Napulo ka Sugo nga maoy bersiyon diha sa atong Catesismo, maka-ingon kita nga ang unang sugo (vv2-3), ikaduha (v7), ika-tulo (v8) ug ika-upat (v12) mas taas og pormulasyon ilabi na gayod kon idugang pa ang gilak-angang mga tudling. Ug ang ika-siyam ug ika-napulo nga mga sugo anaa lamang mahimutang sa usa ka tudling, ang v17. Ngano man? Tungod kay diha sa Catesismo, ang mubong pormulasyon dali nga mahinumdoman o masag-ulo kay sa taas nga pormulasyon.

Ang punto dinhi mao nga labawng praktikal, ang mubo nga pormulasyon aron sayon nga mahinumdoman sa kadaghanan.

Sa pagka-tinuod, ang teknikal nga tawag niining Napulo ka Sugo mao ang DECALOGO (Decalogue) o “Napulo ka mga Pulong” gikan sa mga gilitok nga “MGA PULONG” (v1) sa Dios, nga sa hinebreo mao ang DEBARIM, busa decaLOGO, ug dili decaNOMIO nga kon hubaron “napulo ka mga sugo”. Apan wala gayoy dakong kalainan kining maong butanga.

Ang pagpahimug-at lamang dinhi mao nga ang mga sugo o balaod adunay ilang bul-og o dinamismo – nga kining tanan gilitok ug gipahayag diha sa mga pulong una pa sila nahisulat aron mamahimong mga lagda o kasugo-an. Nga labaw sa tanan, gihatagan og sentralidad ang Gahom sa Pulong sa Dios ug ang Espiritu sa Balaod kay niining maong paagi mapalutaw ug mapatigbabaw gayod ang pagpadayag sa Kabubut-on sa Dios. Kay diha sa pinulongang Hebreo gamhanan ug labaw ka mahinungdanon ang PULONG o DABAR!

Kining maong anggulo sa atong pagtuki diha sa PULONG nahilambigit sa atong dugang pagpalawom sa atong  kahibalo  ug  kasinatian kang Jesus, ang Pulong nga Nagpakatawo. Isip Anak sa Buhing Dios ug Buhing Pulong sa Amahan, Siya ang magbubutyag sa Kabubut-on sa  Amahan  pinaagi sa pagpamati ug pagtuman sa Amahan.

Busa niining panahon sa Kwaresma, dako ang hagit alang kanato sa pagkamakanunayon diha sa pagpaningkamot sa pagpamati sa Amahan ug sa Iyang Bugtong Anak ug ilabi na gayod diha sa pagtuman sa mga sugo ug balaod sa Dios nga maoy konkretong ekspresyon sa Diosnong Kabubut-on alang sa atong kaayohan ug sa atong kaluwasan.

Hinaut unta nga ato kining mahatagan og igong pagtagad diha sa atong mga adlaw-adlaw nga pagpanikaysikay, matinud-anong pagtubag diha sa atong mga buluhaton, ug makanunayong pagtahud diha sa atong pagkinabuhi ug pagpakighilambigit sa atong mga kaigsuonan.  Amen!