PERSPEKTIBO

Levitico 13:1-2,44-46

“Pag-ambit sa Pagpakighi-uli”

Ang atong unang pagbasa karong Domingoha tataw kaayo nga hanig (background) alang sa malangkubong paglarawan ug pagpahayag sa punto nga nagpahipi diha sa kinatibuk-ang wanang sa ebanghelyo alang usab niining Domingoha (Markos 1:40-45) kansang dugokan o tema nahatutok sa sakit nga sanla ug ang pagka-sanlahon o ang estado sa usa ka tawong sanlahon.

Ang anaa sa uyok o kasingkasing niining maong hilisgotan o dugokan mao ang ritwal nga pagkahinlo (ritual purity). Sumala sa atong pagbasa, ang usa ka tawo nga aduna niining maong sakit o balatian dili takus sa pagpakighilambigit sa mga butang ug buluhatong katilingbanon  sa tanang wanang niini. Sa laktud, dili lamang hugaw ang maong binuhat, sinalikway gayud siya. Ug ang labawng masakit niini mao ang pagpaka-walay bili sa kaugalingon pinaagi sa pagbutyag sa publiko sa iyang kaugalingong kahugawan.

Sa teknikal nga pinulongan, mao kini ang buot ipasabot sa EXCOMMUNICATION, ang pagkahimulag sa usa ka tawo gikan sa katilingban, ang pagka-putol niini gikan sa sabakan sa katawhan, ang pagka-gawas o pagka-pinalagpot gikan sa kadaghanan – bisan pa man gani sa kaugalingong tugkaran, balay, banay ug kaliwatan.

Sa liturhikanhong wanang, mahinungdanon usab ang kahulogan niini tungod kay unod ug uyok ang pagkahinlo sa kahilambigitan tali sa Dios ug tawo. Ang pagkahinlo adunay kalambigitan sa sala ug pagkahilayo sa Dios. Ug tungod niini ang pagpakasala samag pagka-putol gikan sa katilingban, pagkahimulag gani sa kaugalingon ug pagkahisalaag.

Apan sa kinatibuk-ang diskurso, ang labaw nga mahinungdanon mao ang diosnong pasaylo nga maoy tulay sa pagpahi-uli sa mga nahisalaag, sa mga nahimulag, sa mga makasasala. Diha sa atong unang pagbasa karon, gipakita kini diha sa pagpakita o pagkonsulta ngadto sa pari (v44) alang sa pagmatuod sa pagtakboy sa maong sakit ug sa pagka-ayo o pagka-alim niini. Sa pagkatinuod, gipahimug-atan usab kini ni Jesus diha sa v44 sa atong ebanghelyo karon aron mapamatud-an ang pagkaayo sa sanlahon. Dugang pa man, diha sa ebanghelyo si Jesus mismo ang nagpahiuli sa tawong nahimulag sa katilingban tungod sa sanla.

Busa kining maong pagkahanig sa unang pagbasa alang sa ebanghelyo, himan lamang alang sa pagsabot ug pagpalawom sa atong pagkahibalo ug pagsinati sa Pulong sa Dios, ang lunsayng Mensahe sa Kaluwasan aron mahibalik ug mahiuli ngadto sa sabakan sa Dios, diha sa katilingban, pinaagi sa pagkahinlo  ug pinaagi sa paghinulsol ug kapasayloan sa mga sala.

Hinaut   unta  nga   diha  sa  atong   pagpakig-ambit sa misyon ni Jesus maantigo unta kitang matisok ug mahiluna diha sa kasinatian sa kapasayloan aron mamahimo kitang mga buhing instrumento o himan sa pagpahiuli sa mga nahisalaag balik ngadto sa sabakan sa Cristohanong katilingban. Ug labaw sa tanan, maantigo gayud unta kitang mopasaylo ug magpadayon diha sa kinaiya sa pag-ugmad ug pagpuyo sa hiyas sa pagka-mapasayloon.   Amen!