YOUTH MATTERS

Intensity #1 ug #2

Didto kami ni Ma’am Tere sa balay sa atong Talahurong Cardinal Vidal atol sa paglinog niadtong miaging Martes, adlawng natawhan sa Arsobispo-Emeritus sa Sugbo.  Igo gyud kaming nakalingkod nga ang iyang balay nag-uyog-uyog.

Hinayhinay, pero ang uban kanamo kusog-kusog gyud, nga nigawas sa balay aron paglikay sa bisan unsang kadaot.  Gani, walay laing gihisgotan sa pagpangaon; ang kasinatian sa matag usa panahon sa linog nga makahahadlok. Apan bisan pa sa kakulba, paspas man lang gihapong mokaon. Hehe!

Pwera komedya, dili bitaw gayud sayon ang kakuyaw nga bation panahon sa mga katalagman nga walay pasayloon. Niining mga panahona, ang Dios mao gayud ang atong dalangpanan ug ang pagsunod usab sa mga safety measures aron makalikay sa kadaot ug katalagman.  Amen!

Apan bisan pa man niini, nagpadayon gihapon ang mga bulohaton sa atong  komisyon.  Adunay Intensity #1 karon diha sa among pagpangandam.  Nag-uyog-uyog ang atong youth center sa pagpangandam sa mga kursong bag-ong ablihan.  Sa tinuoray lang, pagkadaghana gyud diay niining mga butang nga gikinahanglan.

Mga  galamiton  alang  sa  mga  kursong  Food  and Beverage  Services  (waitering),  Housekeeping  ug Bartending (wine mixing). Sa mga ngalan pa lang, morag usa na ka hotel ang gikinahanglan aron makaabli gayud sa Enero baynte.  Sa pagkakaron, daghan pa kaayo kami og kulang, mga palitonon ug mga pangayoonon.  I-ampo ninyo kami.

May nalang gani kay si Dame Julie Gandionco, ang tag-iya sa Julie’s Bakeshop, maoy motabang kanato sa pagpahigayon niining kursong Bread and Pastry Production. Ug nisugot na usab ni Msgr. Achilles Dakay, ang nagtukod sa “Kusina ni Marta,” nga makagamit na kita sa mga kahimanan sa pagluto og pan ug uban pa.  Salamat kaayo, Monsignor!

Ug sa laing bahin, adunay Intensity #2 nga namatikdan.  Nagdahunog ang mga karsada nga gilaktan sa mga Parish Youth Leaders aron motambong sa PATHWAY 2012, ang tinuig nilang panagtigom alang sa orientation kabahin sa 27th LWYD, nga may tema, “Standing Firm in Faith … Doing all your Work in Love.”  Gidapit ang matag parokya sa pagpadala og duha o tulo ka parish youth leaders.

Adto kini himoon sa Sacred Heart Parish Social Hall, sa may dalan D. Jakosalem karong Pebrero 11, 2012, sa alas 8:00am – 5pm.  Ang registration fee nagkantidad og Php 125.00 kay apil naman niini ang paniudto ug snacks.  Palihug og tawag sa atong opisina 253-0173, alang sa dugang kasayuran. Konpirmado na ang 58 ka youth delegates gikan sa Dyosesis sa Maasin.

Kining kasaulogan sa 27th LWYD maoy usa ka panagtambayayong sa mga parokya nga nahisakop sa District 1 – Cebu-North, nga gipangulohan sa mga pari nga Recoletos, nga anaa madestino sa Our Lady of Mt. Carmel- Recoletos, dakbayan sa Sugbo.

Ug sa kasamtangan, si Padre Kit Sestoso ug Padre Mark Barneso mao ang morepresentar sa COY, uban ang mga volunteers, diha sa pagtabang sa mga kalihokan, ilabi na sa PATHWAY ug sa umaabot nga 27th Local World Youth Day celebration (Marso 29 – Abril 1, 2012) dinhi sa dakbayan sa Sugbo.

Donation for the Archdiocesan YouthLinks Center:

Mr. Charlito & Mrs. Janice Calumbay   -  Php 2,000.00