Sa miaging February 22, Ash Wednesday kon Miyerkoles sa Badlis.  Pagpahinumdom kanato nga bisag unsa kita ka gamhanan, ma-presidente sa nasud o ma-chief justice sa supreme court;  bisag unsa kita ka adunahan (bisag pilay atong dollar deposit – ma-TRO kinig sa dili)… sa abog kita pauli.

Sa ato pa, ma-chief of police ka, o ma-Tanod lang; ma-city mayor ka, o ma-garbage collector lang; ma-regional director ka, o ma-driver lang… walay distinction ang atong pagpauli sa abog.

Walay kapuslanan kining tanan… kon unsa kita ning kinabuhia, kon sa kauwahian, inigpauli nato sa abog, malaglag ang atong kalag.  Unya ra ba, kon manubra na kaayo ang atong pagka-attached sa kalibutan, makalimot kita nga ang tawo lawas ug kalag.

Nga dili kay ang lawas ray atong atimanon, kundili, labaw sa tanan, ang kalag. After all, ang lawas mobalik sa abog ug madugta, samtang ang kalag molungtad.

Ambut ngano nga mao may atong hatagan og priority ang lawas over sa atong kalag? Mao kini ang hinungdan ngano nga adunay Miyerkoles sa Badlis… pagpahinumdom kanato nga lumalabay lang ang tanan ning kalibutan.

Nasayod kitang tanan niini, ambut ngano nga mao may atong palabihon ang panginahanglan sa lawas?

Unya, ambut diin sila niini: Moingon sila nga kon dili kuno magpabadlis mahimo kunong mokaon og karne. Lagmit, daghan ang wala magpabadlis sa miaging Ash Wednesday, kay puno man gihapon ang mga kan-anan sa barbecue ug burger!

Niining panahon sa kwaresma, aduna kitay 40 ka adlaw paghinuklog ug pagpamalandong. Matud pa ni Fr. Jerry Orbos: “We have 40 days to tone down our worldly and  material agenda, and to upgrade our spiritual well-being with prayer, penance and good works.” Lisud ba ning buhaton?