SUKNAAN

PANGUTANA:

        Ang sibya sa Traditionalist sa Feb. 5, 2012 sa iyang sibya sa Radyo, siya miingon, nga ang Misa Tredentina nagpadayon nga maoy saulogon nga Misa sa tanang mga pari, mga Obispo o bisan pa sa Papa, kon magmisa sila og dili Latin, excommunicated silang tanan, sumala pa ni Papa Pio V sa Quo Primum. Tinuod ba kini? Ug sa sulat sa Papa nga gitawag og De Defectibus, ang mga sayop diha sa Misa, makahimo niini nga invalido. Kay gikuha sa Bag-ong Tamdanan sa Misa Novos Ordo Missae, ang anaa sa konsagrasyon, Mysterium Fidei, Misteryo sa Pagtuo, ug ang pro multis alang sa daghan giilisdan sa bag-ong Misa og pro omnibus. Kay giilisdan, invalido ang mga Misa nga binag-o. Husto ba siya?

TUBAG:

Dili husto ang iyang pagpasabot sa Quo Primum. Si Papa Pio V sa Quo Primum, mipasabot nga sulod sa Latin Rites, ang mga pari, Obispo sa iyang panahon, Misa nga Latin lamang. Apan gihatagan niya og exception kun kagawasan ang mga nasud nga dili sakop sa Latin Rites pero mga Catoliko nga nasud, “. . .have been in any way exempted. . . those in which the practice of saying Mass differently  was  granted  over  200 years. . . We hereby permit them to celebrate according to its rite. . . (Quo Primum par. 5). Klaro nga dili alang sa tibuok kalibotang Catoliko ang obligasyon sa Misa nga Latin. Kini balaod ni Papa Pio V. . . which shall have the force of law in perpetuity (sama sa par. 5). Kini balaod nga gipatuman in perpetuity sa iyang panahon and forever.

Mao gani nga Sacro Sanctum Concilium par. 36, si Papa Pablo VI wala magwagtang sa Misa nga Latin. . . “agig pagtahud sa linain nga balaod ang pagpatuman sa Misa nga Latin gipalungtad gihapon sa Roman Rites.” Apan si Papa Pablo VI sa iyang otoridad mihimog kaugdahan, “apan dili Latin Mass Lamang makahimo usab ang pagmisa ang mga pari sa laing pinulongan nga masabot sa mga tawo. . . nagpabilin nga wa usba ang lintunganay sa Misa” (The Mass is the same No. 4 & 5, No. II).

Ang balaod sa nag-una nga Papa mihimo nga mausab sa bag-ong Papa kon kini bahin nga mausab. Si Papa Pablo VI miingon bahin sa kausaban sa pinulongang gigamit sa Misa, dili kini bahin nga Dogma kun dili mausab.

Ang Mysterium Fidei nga gisagol sa words of consecration kaniadto, wala mahiapil sa form sa Konsagrasyon anaa  kini  gihapon  apan gibutang ug isulti o awiton sa pari human sa konsagrasyon. Ang pro multis, alang sa daghan kun ilisdan og pro omnibus, “alang sa tanan,” wa’ kini makausab sa kahulogan sa form of the Mass, si San Pablo miingon bahin sa Eyukaristiya: “Ang atong gipikaspikas,  dili  ba  kini  mao  ang  pagpakig-ambit  sa Lawas ni Cristo? Kay usa ka Pan, usa ka Lawas kitang Daghan, ang Tanan nga nanagpangambit sa usa ka Pan.” (1 Cor. 10:16-17). Wa mausab ang form kay ang kining alang sa daghan, nagpasabot kanatong tanang mga tawo nga mituo ug nanagpangambit sa Lawas ni Cristo, ang Eyukaristiya.

Ang pagdiklarar og pag-excommunicate sa usa ka tawo gikan lang sa Gahom sa Papa o sa mga Obispo (Dict. of Canon Law page 184). Busa karon, ang usa ka layko nga mo-excommunicate sa Papa o mga Obispo nangilog sa gahom sa Papa ug sa Obispo. Dili kini angay niya.