GIYA SA BEC/GKS MAKALIPANG

Giandam sa BEC Secretariat

Marso 4, 2012

IKADUHANG DOMINGO SA KWARESMA

TEMA:  “ANG PAGKA-USAB SA PANAGWAY NI JESUS”

1.  Pasiuna sa Ebanghelyo:

Ang pagbag-o sa panagway ni Jesus (kon Transfiguration) larawan sa Iyang pagka-Dios. Pinaagi niini gidasig ang Iyang sumosunod sa mga umaabot nga pagsulay, lakip na ang Iyang pag-antos ug pagkamatay.

2.  Pagbasa, Pagpaminaw, Pagpamalandong sa  Pulong sa Dios:

     (Kalambigitan sa Kinabuhi ug sa Pulong sa Dios)

Unang Pagbasa              :  Gen. 22:1-2, 9, 10-13, 15-18

Ikaduhang Pagbasa      :  Roma 8:31-34

Ebanghelyo                     :  Mk. 9:2-10

3.  Kahilum (Paghatag og higayon nga ang Ginoo mosulti kanato):

Mga pangutana isip giya sa pamalandong ug paambitay:

a)   Unsay pulong o mga pulong ang nakatandog kanako  sa maong Ebanghelyo?  Ngano man?

b)   Unsay mensahe niini para kanako nga akong ikapaambit sa akong mga kaubanan sa BEC selda?

4.  Pag-inambitay (Hatagan og higayon ang matag-usa sa pag-paambit sa ilang kasinatian sumala sa Ebanghelyo nga gibasa):

5.  Lihok-Sulbad (Pagahimoon human sa paambitay):

     Pag-estorya ug unsa ang mga buluhaton nga himoon:

a)   Pagtaho sa miagi nga buluhaton.

b)   Unsay bag-ong buluhaton nga himoon?

6.  Kinabuhi ug Pagtulon-an sa Simbahan (Pagabasahon human sa paambitay):

Ang pagka-usab sa panagway ni Jesus maoy sentro sa Ebanghelyo ni Marcos. Dili sulagma nga gidala ni Jesus ang tulo ka tinun-an sa bukid ingon ni Moises nga mitungha sa bukid sa Sinai aron pagsinati sa Dios. May mga higayon diin mapaminaw ug masinati nato ang Dios ug ang Iyang mensahe diha sa kahilom.

Sa pagka-usab sa panagway ni Jesus ang Apostoles nakasinati og dyutay sa pagkabanhaw. Usa ni ka bag-ong kasinatian sa Dios nga talagsaon ug nag-aghat nila pagpabilin sa bungtod uban ni Jesus, bahala na ang tawo sa ubos: kadtong mga gipanggutom ug nag-antos nga nangandoy sa tibuok nga kaluwasan.

7.  Pangamuyo:  (tanan)

Mohalad ko og sakripisyo sa pasalamat,

Ang ngalan sa Ginoo akong sangpiton.

Ang saad ko sa Ginoo akong tumanon,

Atubangan sa tanan Niyang katawhan.  Amen.