SUKNAAN

PANGUTANA:

          Nganong gitawag man sa mga Catolico ang tulo ka mga mago og tulo ka hari. Nganong gitawag man sab nila kini  og  GASPAR, MELCHOR ug BALTASAR, wa man kini  sa   Bibliya?  Unsa man kining bitoon nga giingon nga nagagiya kanila? Ang tinuod nga bitoon dili man moirog nganong mag-una man kini sa mga mago aron paggiya nila?

TUBAG:

Tinuod nga ang asoy sa Bibliya kadtong tulo nga gikan sa Sidlakan nga nangita kang Jesus giingon nga sila mga pantas kun mago, mga makinaadmanon gikan sa Asia. . . “Ania karon miabot sa Jerusalem ang mga mago nga gikan sa Sidlakan,” (Mat. 2:1). May mga kasugiran nga ang mga mago mga hari usab sa Silangan nga napildi sa gubat, apan wala sila patya sa nakabuntog kanila. Kay sila mapuslan tungod sa ilang kaalam. Gani batid sila sa astrologia kun mga butang sa kawanangan ug uban pa.

Sa tagna ni Salmista David mga hari sila nga moduaw ug mosimba sa Bata. “Ug ang mga hari sa Tarsis ug ang mga kapupod-an magahatag og buhis;

“Ang mga hari sa Sheba ug sa Seba magahatag og gasa.

“Oo,  ang  tanang  mga  hari  magaluhod  sa  atubangan Niya. . .” (Sal. 72:10-11).

Ania ang hisgot bahin sa tulo ka ngalan. “Si Melchor giingon nga hari sa Persia, si Gaspar hari sa India ug si Baltasar hari sa Arabia, giingon nga sa Cologne anaa ilang mga relikyas.” (The New World Dictionary Concordance page 50, 201 & 429). Giingon sa tradisyon nga ang tulo, Melchor, Gaspar ug Baltasar mao ang mga mago nga migasa kang Jesus. Gituhoan nga sila may mga kauban, apan giisip lang nga tulo tungod sa tulo nila ka mga gasa, ang Insenso, Mira ug Bulawan. Nga kini nagkahulogan sa pagka-Dios ni Cristo, ang Iyang pagkatawo sa Kasakit ug ang Iyang pagka-Hari.

Bahin sa BITOON may tagna bahin niini, “Nakita ko siya apan dili karon, akong natan-aw siya apan dili sa haduol. Adunay bitoon nga moabut gikan kang Jacob ug magatindog ang usa ka cetro gikan sa Israel,” (Numeros 24:17). May bitoon nga migiya sa tulo ka mago, sila miingon: “Hikit-an namo ang Iyang bitoon sa Sidlakan ug mianhi kami aron sa pagsimba Kaniya,” (Mat. 2:2). “Ug sa pagkakita nila sa bitoon nangalipay sila sa dako gayud nga kalipay. Ug sa pagsulod nila sa balay hikit-an nila ang Bata nga kauban ni Maria nga Iyang inahan, ug nanghapa sila ug ilang gisimba Siya,” (Mat. 2:10-11). Giingon nga ang bitoon dili moirog apan sa Dios, walay dili Niya mahimo, “Kay walay malisud diha sa Dios,” (Jer. 32:17). Bisan ang mga butang sa kinaiyahan mahimo nga gamiton sa Dios alang sa Iyang balaan nga tuyo. “Kay gihikay Niya ang tanan diha sa usa ka walay katapusan nga han-ay ug gibut-an Niya nga makasubay nianang paagiha nga walay kinutoban,” (Sirac 16:27).