YOUTH MATTERS

Mga Bag-ong Kurso sa YouthLinks Sugdan

Pit Señor!  Moulan man o moinit karon, magpadayon gihapon ang pagsaulog sa Piyesta sa Sugbo, pinaagi sa makabungog nga pagpasidungog sa atong Mahal nga Señor Sto. Niño!  Nagsang-Pit kami Kanimo, Señor Sto. Niño … alang sa mga batan-on sa Sugbo!  Pit Señor!

Pit Señor! Tungod sa walay puas nga panalangin sa Ginoo, matuman na gayud ang hinungdan nganong ang atong Youth Center gitukod ug nahuman.  Kay sa sunod bulan (Pebrero) ang mga bag-ong kurso sa TESDA ato nang sugdan. Pit Señor!

Gikalipay kaayo nako ang pagpahibalo kaninyo, ilabi na gayud ngadto sa atong mga out-of-school youth, nga sugdan na ang kurso’ng Bread & Pastry Production didto sa atong sentro.  Ug hinaut nga kini inyong pahimuslan.

Si Ma’am Julie Gandionco, ang tag-iya sa nabantog nga Julie’s Bakeshop, mao gayud ang mangunay sa pagtudlo unya kaninyo unsaon pagluto sa lami nga pan, nga mapalit bisan asa’ng eskina ug merkado.  Siya mismo ang mitanyag sa pagpa-ambit sa iyang kahanas, kasinatian ug mga kahimanan alang sa pagtudlo sa mga batan-on nga angay’ng tabangan.  Daghang salamat kanimo Ma’am Julie!

Ug kay limitado ra man ang atong lugar, busa limitado usab ang unang makapahimulos niiining kurso sa pagpangluto og pan.  Busa giawhag ko ang mga interesado sa pagtawag sa telepono (520-5234/254-6065/253-0173) sa atong sentro kay adunay gitakda nga Screening of Applicants.  Seguroa lang gayud nga ikaw usa ka out-of-school youth, nga andam tudloan ug dili gahi ug ulo.  Pit Señor!

Dugang pa niini, magpasalamat usab ako sa tag-iya ug staff sa inila na kaayong MGB Skills Development & Assessment Center, Inc. nga tungod sa ilang pagtabang, ang mga kurso’ng Food & Beverage Services (waitering), Housekeeping, Bartending (wine mixing) masubhan.  Adunay TESDA certificates alang sa makapasar unya sa mga kursong ablihan.

Sila’ng Sir Didit ug Ma’am Teding mismo ang nibisita sa atong sentro aron matan-aw ang lugar diin ibutang ang mga kahimanan sa pagtudlo niining kursong may kalabutan sa Hotel & Restaurant Management.  Tungod unya niini, ang taas sa youth center, sa sunod bulan, mura na unya kini’g usa ka Restobar ug Hotel tan-awon.

Gani, gawas nga motabang sila sa pagtudlo, mohatag pa gayud si Sir Didit og mga kahimanan ug butang nga kinahanglanon kaayo sa maong mga kurso.  Salamat, salamat kaayo kaninyo, MGB!  Pit Señor!

Alang niadtong nagpaabot nga kining mga kurso mabuksan na sa atong sentro, ayaw paglangan … bisitai dayon ang atong eskuylahan.  Aron makaapil kamo sa screening nga himoon sunod bulan.

Ug samtang gipangandaman kining tanan, nagpadayon ang pagtudlo sa mga computer courses sa atong center.  Gani karong umaabot Enero 28, 2012, adunay dul-an 60 kabuok estudyante’ng mogradwar.  Ug dungan unya sa mga bag-ong kurso’ng ablihan, magpadayon gihapon ang pagpanawat og mga aplikante sa computer courses, sama sa Adobe Photoshop, Computer Hardware Servicing,  AutoCAD ug uban pa.  Pit Señor!

Donations for the Archdiocesan Youth Center:

Coinbank:

106-St. Augustine Parish, Carmen Cebu    –    1, 844.00

110-San Narciso Parish, Consolacion         –       325.20

113-San Roque Parish, Yati, Liloan           –       412.05

122-Our Lady of Mt. Carmel Parish,

Cantumog, Carmen                               –    1, 230.25