SUKNAAN

PANGUTANA:

      Bro. Soc, ang mga Traditionalist miingon nga sila mao ang mga matuod nga Catoliko kay matud pa nila sila mao ang nagpabilin sa matuod og orihinal nga Misa, ang Misa Tredentina, Latin Mass. Ug matud pa nila nga ang nagmisa og dili Latin Mass eskumulgado, bisan pa ang inyong Papa karon nga nagmisa ug dili Latin, mga arsobispo, Obispo ug mga pari lakip na ang mga Catoliko nga nanimba sa dili Latin Mass, eskumulgado. Siya mikutlo sa Balaod ni Papa Pio V sa Ouo Primum, “Gipahiuli ug nadiskobrehan niya nga ang Misa nga Latin mao ang orihinal diha sa Substance ug Rite. Ang mga Cardinal, mga administrador nga nagdumili, kon magmisa sa laing pinulongan, sila mga excommunicated. Ug kining maong Misa Tredentina magpadayon nga walay katapusan.” Husto ba ang pagpasabot sa mga Traditionalists? (Carlos Pastorite, San Isidro, Talisay City, Cebu.)

TUBAG:

Ang gipasabot ni Papa Pio V mao ang Roman Rite, inagda sa Concilio sa Trento 1545 A.D. gibaod niya nga tumanon ang Misa nga Latin, sa Roman Rite mao kini ang matud pa niya orihinal. Pero, ang matuod nga ang Iglesya nga gitukod ni Cristo sa Jerusalem, sakop sa Eastern Rite, mao gayud ang Orihinal kun Sinugdan sa Misa. Si Cristo nagmisa sa pinulongan nga Aramaic, dili Latin ug ang balaod ni Papa Pio V alang lang sa mga nasud nga ubos sa Roman Rite. Siya miingon sa Ouo Primum, “Alang sa mga nasud nga Catoliko nga nagsugod sa ilang Misa sa ilang kaugalingong pinulongan nga mikabat na og labing menos 200 ka tuig, magpadayon sila sa pagmisa ginamit ang ilang kaugalingong pinulongan.” Ang baod ni Pio V dili alang sa pagpatuman sa tibuok kalibutan.

Dinhi makita nato, nga ang pinulongan nga gamiton sa Misa, dili Dogmatic kondili gayud mausab. Kay usa sa kinaiya sa pagka Dogma sa usa ka doktrina ug sa pagbansay nga kini tulomanon alang sa tanang Catoliko sa kalibutan. Ang definition sa Dogma mao kini: “Fide Divina et catolica ea omnia credenta sunt, quae in verbo Dei scripto vel taditio continentur et ab Ecclesia sive solemni ludicio sive ordinario et universali magisterio tamquam divinitus revelata credenda proponuntur.” Kini nagpasabot: Kining tanang mga butang nga gipatuhoan nga Langitnon ug Catoliko nga pagtuo nga gipasukad sa pulong sa Dios, nahasulat o sa tradisyon nga gipatuman sa atong Catoliko nga pagtuo sa solemning pagpadayag sa naandan o sa kagahuman sa pagpatudlo sa tibuok kalibotan, (Fundamentals of the Catholic Dogma pahina 4).

Ang atong Papa nga dunay otoridad gikan ni Cristo, mao ang makapadayag sa unsa nga doktrina nga mausab ug dili mausab (Catechism of the Catholic Church No. 2034).

Si Papa Pablo VI inagda sa Conciliar Teachings gikan sa mga kaobispohan mipadayag niini: “Ang pinulongan nga gamiton sa Misa dili Dogma, kondili mausab. Busa may kausaban diha sa Misa sa bahin nga mausab. Mahimo nga ang Misa sa Iglesya Catolika ang paggamit sa pinulongan sa mga tawo. Apan dili pinulongan lang sa mga tawo kondili sa Latin usab. Mao nga gipiho kini nga ang Latin nga Misa mahimong gamiton sa mga Pari. Apan mahimo usab ang pinulongan sa katawhan (Canon No. 928, Secro Sanctum Concilium, par. 36). Busa sayop ang panudlo sa mga “Traditionalists”. Giputol nila ang panudlo ni Papa Pio V.