CARDINAL VIDAL, MGA KATEKISTA GIPASIDUNGGAN
CARDINAL VIDAL, MGA KATEKISTA GIPASIDUNGGAN
Gipasidunggan sa mga katekista sa artsidyosesis si Ricardo J. Cardinal Vidal, ang arsobispo-emerito sa Sugbo, pinaagi sa pagtunol kaniya sa Exemplary Service Award atol sa gipahigayon nga 5th Archdiocesan General Catechetical Assembly niadtong miaging Nobyembre 29, 2011 sa Hoops Dome, Lapu-lapu City.
Sumala pa sa mga tagdumala sa Catechetical Apostolate sa artsidyosesis, nga maoy nagpasiugda sa maong assembly, nga sa iyang dul-an 30 ka tuig isip Arsobispo sa Sugbo, daghan ang iyang mga nabuhat alang sa catechetical program sa artsidyosesis ug sa mga katekista.
Lakip niini ang iyang paghatag og dako ug maanindot nga center alang sa mga katekista, nga karon mao ang buhatan sa Archdiocesan Cat
echetical Center (ACC), nga nahimutang sa C. Borces St., Mabolo, Cebu City.
Kahinumduman nga si Cardinal Vidal ang nagpagpatawag sa 4th Diocesan Synod of Cebu, diin pito sa mga “Statutes on Christian Formation” alang gayud sa mga katekista ug sa mga gimbuhaton niini. Sa tuig 1988, isip kongkretong bunga sa maong synod, iyang gitukod ang Archdiocesan Catechetical Apostolate, nga gilangkoban sa Archdiocesan Catechetical Board, nga mao ang executive body, ug ang Archdiocesan Catechetical Center isip implementing arm.
Atol sa maong general assembly gilusad usab ang souvenir book “Ang Magpupugas” nga nagtala sa tanang mga katekista nga nangalagad sa artsidyosesis ug nagsaysay sa kasaysayan sa maong apostolado sa pagpanudlo dinhi sa local nga Simbahan sa Sugbo.
Sa paghatag ngadto sa talahurong cardinal sa maong award, gihandum sa mga katekista ang dakong pagpangga sa kanhi arsobispo sa Sugbo kanila. Gihinumduman ni M
sgr. Vicente Tupas, Jr., ang chairman sa Archdiocesan Catechetical Center, ang mensahe sa cardinal niadtong Agosto 1, 2006 atol sa Catechists’ Tribute to Cardinal Vidal sa iyang Year of Jubilees: “I think being a catechist keeps you young. I also think that when I finally retire, I will volunteer as a catechist…if Fr. Jonie (Tupas) will accept me.”
Posthumous Awards
Atol usab sa General Assembly, gihatagan og posthumous award sila si anhing Rdo. P. Jovencio Rabusa ug Mrs. Basilides Flores. Si Padre Rabusa, nga namatay niadtong 2009, giila sa iyang linain nga pagtagad ug pag-amoma sa mga katekista. Sumala pa, sa mga parokya diin siya nakapangalagad iya gayud nga napadaghan mga katekista ug napalambo ang ilang apostolado.
Samtang si Mrs. Flores, nga namatay niadtong tuig 2009, gipasidunggan sa iyaha usab nga hamili nga pagpanerbisyo isip usa ka katekista sulod sa hataas nga panahon, ilabina isip coordinator sa mga katekista sa Tudela sa isla sa Camotes.
Calungsod Award
Lain usab nga highlight sa 5th General Assembly mao ang paghatag sa Beato Pedro Calungsod- Sugbuanong Katekista Award ngadto sa labing hamiling katekista sa artsidyosesis.
Unom ka mga finalists karong tuiga nga gikan sa mga distrito ang gipilian. Sila mao si Nida Respuesta sa District 1, Simeona Tundag sa District 2, Bruno Rejulio sa District 4, Eustaquia Paran sa District 5, Delita Grondiano sa District 6 ug Jesusa Camaongay sa District 7.
Ug sa unom ka finalists, si Delita Grondiano, ang nominee sa District 6, mao ang napiling Beato Pedro Calungsod- Sugbuanong Katekista Awardee.
Si Grondiano, nga sakop sa Parokya ni San Martin de Porres sa Ilihan, Tabogon, 59 anyos, biyuda ug 26 na ka tuig nga katekista, nagsugod nga walay formal formation isip usa ka katekista. Matud pa niya nga giingnan lang siya sa pari, “Ikaw tudlo ka ugma”. Nagmasinugtanon siya sa pari uban sa pag-ampo, “Lord, giyahi ko kanunay,” subay pa niya.
Sa iyang testimonya, nakaagi siyag mga pagsulay isip katekista sama sa pagka-sakit sa iyang bana samtang nagmabdos siya sa iyang ika-duhang anak. Buot siyang paundangon sa iyang bana ug nag-ampo siya, “Lord, kun imo kining pagbuot tagai akog paagi nga makapadayon ako”.
Misanot ang iyang pag-antos sa pagkamatay sa iyang bana tungod sa sakit. Sa pagkamatay niini, ang iyang mga ugangan mibadlong nga dili magkanunayan sa simabahan kay gagmay pa ang iyang mga bata. Apan, sumala pa niya, nangita siyag paagi nga dil mahunong ang iyang pagka-katekista ug ang yang gibuhat mao nga dad-on niya iyang bata sa eskuwelahan aron makatudlo ug magkugos sa bata samtang magtudlo.
Gani, paghinumdum pa niya, kon mag-miting ang mga katekista, ang iyang mga bata anaa sa ilang taliwala. Matud pa niya nga daghan ang mga pagsulay nga iyang naagian apan sama ni Beato Pedro Calungsod, kansang pasidungog gihinganlan ang maong award nga nadawat, ang pagsalig sa Dios ang nakapalahutay kaniya.
Sa kasamtangan, si Delia Grondiano sakop sa Speakers’ Bureau sa iyang distrito, ang District 6 kun Far North District .
Ang Beato Pedro Calungsod- Sugbuanong Katekista Award himoon matag 3 ka tuig nga mao usab ang pagpahigayon sa general assembly sa mga katekista.
Exemplary Service Awardee:
Ricardo J. Cardinal Vidal
Post Humous Awardees
Fr. Jovencio Rabusa Mrs. Basilides Flores
Beato Pedro Calungsod- Sugbuanong Katekista Awardee:
Delita Grondiano
Finalists
N Nida
Nida Respuesto
Simeona Tundag
Bruno Rejulio
Eustaquia Paran
Jesusa Camaongay
