PERSPEKTIBO

Isaias 63:16-17,19; 64:2-7

“Kaluhang Kamatuoran”

Atol niining atong pagbukas sa bag-ong liturhikanhong kalendaryo ug diha sa pagsugod nato sa panahon sa Adbiyento, ug sa ato na nga nahisgotan sa makadaghan na nga higayon, ang Unang Domingo sa Adbiyento kanunay magtutok sa kinatibuk-ang tema ug mensahe sa Katapusang Paghukom o Parousia nga mao ang Ikaduhang Pagbalik sa Ginoo sumala sa Iyang gisaad ngadto sa mga apostoles sa Iyang pagkayab balik ngadto sa tuo sa Iyang Amahan.

Ang atong unang pagbasa karong Domingoha nga kinutlo gikan sa Libro ni Propeta Isaias maayo kaayo nga pagkapaha-um sa bul-og sa tema sa atong liturhiya niining Unang Domingo sa Adbiyento.

Kon atong tan-awon pag-ayo, kining maong langkob sa pagbasa anaa na mahimutang sa katapusang bahin sa kapitulo 63 ug unang bahin sa kapitulo 64. Kining maong mga kapituloha nahilangkob sa gitawag og Ika-Tulong Libro ni Propeta Isaias kansang mensahe gisibya sa propeta nga gituho-ang dili si Propeta Isaias mismo kondili usa ka disipulo nga migamit lamang sa ngalan ni Isaias apan hugot ug tiunay nga nagpadayon ug nagpatunhay sa mithi ug diwa ni Isaias. Ang panahon kanus-a gimantala kining maong mabulukong mensahe nahitabo human na ang pagkahikling sa katawhan didto sa Babiloniya ug nga niadtong tungora nahibalik na sila sa Israel ug naningkamot nga matukod ang Templo ug pagpanday sa pagtuo ug relihiyon sa mga Judio nga mao ang Judaismo.

Kining maong matang sa pagsulat ug pagpahayag gitawag ug gisabot isip “apokalypsis” sama sa tonada sa Libro sa Ang Gipadayag sa Bag-ong Testamento. Sa pagkatinuod, ang propeta nga wala magpa-ila sa iyang kaugalingon apan nagtago lamang sa labing kusganong ngalan ug inpluwensya ni Isaias giila ug gisa-ulog isip “amahan” o tigpasi-una niining maong matang sa pagpanulat mahitungod sa katapusan sa tanang butang diha sa panlantaw sa katapusang paghukom.

Kining maong apokaliptikanhon nga paglarawan usa ka mahinungdanong paagi sa pagpahinumdom ug pagpahimangno kanato dili lamang sa umaabot nga katapusan sa tanang butang, kondili sa ato usab nga tagsatagsa ka kamatayon nga maoy atong gipangandaman.

Ang Panahon sa Adbiyento nga ang lintunganay nga mensahe ug kamahinungdanon mao ang kalipay ug pagmaya tungod sa pag-abot sa Ginoo ug Manunubos, adunay nagpaluyong “penitensiyal” nga tonada. Tungod kini sa kinatibuk-ang katuyoan sa pagpangandam alang sa pagsugat ug pagdawat sa Ginoo dinhi sa atong taliwala ug ilabi na gayod sa atong kasingkasing. Ug mao kini karon ang gitutokan sa mensahe ni Propeta Isaias.

Diha sa 64:5-7 tataw kaayong gipahimug-atan ang atong kalapasan ug kadautan uban sa atong tawhanong kahuyangan. Gituyo kini sa propeta aron sa pagpatidlum sa kamatuoran mahitungod sa kaangayan sa Dios diha sa Iyang pagsilot ug sa pagpalutaw sa lain pa gayong kamatuoran sa Iyang kaluwasan alang sa mga mahinulsulon.

Mao kini ang “kaluhang kamatuoran” nga angayan natong kalawaton diha sa pagpalambo nato sa atong kinabuhing cristohanon. Kini maoy mogiya kanato sa pagsubay nato sa dalan sa kaluwasan ug sa pagpatunhay sa katarung ug kabubut-on sa Dios kansang pag-abot maoy atong gipaabot ug gipangandaman diha sa tumang pagkamala-umon ug kanunayng pagka-madasigon. Amen!