GIYA SA BEC/GKS MAKALIPANG

Giandam sa BEC Secretariat

Disyembre 4, 2011

IKADUHANG DOMINGO SA ADBIYENTO

TEMA: “ANG MGA KAGIKAN NI JESUS”

1.  Pasiuna sa Ebanghelyo:

Ang Manluluwas migitib sa atong yuta ug sa piniling kaliwat sa Israel. Adunay 42 ka ngalan sa talaan nga gihan-ay sa tulo ka hugpong nga dunay 14 ka ngalan. Kining numeroha usa ka makahuloganong simbolo sa mga Judio. Dayag na lang  nga dili kini usa ka kompleto nga talaan.

2.  Pagbasa, Pagpaminaw, Pagpamalandong sa  Pulong sa Dios:

     (Kalambigitan sa Kinabuhi ug sa Pulong sa Dios)

Unang Pagbasa              :   Is.40: 1-5, 9-11

Ikaduhang Pagbasa      :   2Pt 3: 8-14

Ebanghelyo                     :   Mt. 1: 1-18

3.  Kahilum (Paghatag og higayon nga ang Ginoo mosulti kanato):

Mga pangutana isip giya sa pamalandong ug paambitay:

a)   Unsay pulong o mga pulong ang nakatandog kanako  sa maong Ebanghelyo?  Ngano man?

b)   Unsay mensahe niini para kanako nga akong ikapaambit sa akong mga kaubanan sa BEC selda?

4.  Pag-inambitay (Hatagan og higayon ang matag-usa sa pag-paambit sa ilang kasinatian sumala sa Ebanghelyo nga gibasa):

5.  Lihok-Sulbad (Pagahimoon human sa paambitay):

     Pag-estorya ug unsa ang mga buluhaton nga himoon:

a)   Pagtaho sa miagi nga buluhaton.

b)   Unsay bag-ong buluhaton nga himoon?

6.  Kinabuhi ug Pagtulon-an sa Simbahan (Pagabasahon human sa paambitay):

Si Jesus, Anak ni Abraham, ang amahan sa tanang magtotoo. Ang Dios nagsaad sa paghiusa sa tanang kanasoran alirong sa Iyang kaliwat.

Sa gisaad na sa Israel, si Jesus usab ang Anak ni David. Ang mga Hari sa Israel nga sumusunod ni David nagdalag importanting bahin sa balaang kasaysayan. Ang uban nila maayo, ang uban daotan.

Ang lista naglakip hangtod pa ni Jose, ang Amahang misagop ni Jesus. Alang sa mga Judio, kining pagkasinagop ni Jesus igo na nga nagpaila niya, sama ni Jose mismo nga Anak ni David.

Kining talaan nagpadayag sa mga nasunod ni Jesus gikan ni Jose. Ug mipasunod si Jesus ining espirituhanong kabilin gikan sa Israel ngadto sa kaugalingon Niyang katawhan, ang Simbahan. Daghan ta ug napanunod sa mga Judio, sama pananglit sa Daang Testamento, ang Bibliya sa mga Judio.

Busa nakagamot pag-ayo si Jesus sa atong tawhanong kaliwat.

7.  Pangamuyo:  (tanan)

Mamati ako sa isangyaw sa Dios,

Kay nagsaad Siya’g kalinaw sa Iyang katawhan.

Mohatag ang Ginoo sa kaayohan,

Ug ang atong yuta sa Iyang abot.  Amen.