Date: May 29, 2011

MGA BAG-ONG RECTOR

SA SEMINARIO GITUDLO

GITUDLO ni Arsobispo Jose S. Palma sila si Reb. P. Leonilo  B.  Igloria isip bag-ong Rector sa San Carlos Seminary College ug si Reb. P. Benedicto John  C.  Sarchez, Jr. alang  sa Blessed  John XXIII (Minor) Seminary, Mabolo, Cebu City.

Nadestino si P. Igloria sa San Carlos Seminary College sukad pa niadtong 2001 isip magtutudlo ug formator.  Siya nangalagad usab isip Vice Rector sa wala pa siya matudlo isip Rector puli ni Msgr. Roger Fuentes.  Si P.  Igloria mao ang ika-unom nga Rector sa San Carlos Seminary College sukad kini natukod niadtong 1971, gikan ni Msgr. Alfeo Manalili, Msgr.  Felino Caballa, Msgr. Oscar Villamor, Bishop Isabelo Abarquez ug Msgr. Roger Fuentes.

Sa laing bahin, si P. Benedicto John C. Sarchez, Jr. napili usab nga Rector sa Blessed John XXIII Seminary puli ni Msgr. Alfredo Romanillos.

Siya nangalagad sa maong seminaryo sukad pa niadtong tuig 2004 ug naghupot sa katungdanan isip magtutudlo, formator, principal ug Vice Rector sa wala pa siya matudlo isip rector.

Si P. Sarchez mao ang ikapito nga nahimong Rector sa Seminario Menor sukad napasa ang pagdumala niini ngadto sa mga Pilipinong pari, gikan ni Msgr. Alberto Belarmino, Msgr. Adelito Abella, Obispo Leopoldo Tumulak, Msgr.  Romualdo Kintanar, Msgr. Elias Matarlo ug Msgr. Alfredo Romanillos.

Ang mga bag-ong Rector,  Reb. P. Leonilo Igloria ug Reb. P. Benedicto John Sarchez pormal nga mosugod sa ilang pangatungdanan inigbukas sa tingtungha sa klase, 2011-2012.