Isyu sa Abril 24, 2011

ARSOBISPO PALMA MODAWAT SA  PALLIUM KARONG HUNYO 29

Dawaton unya ni Arsobispo Jose Plama ang simbolo sa iyang mandato isip Arsobispo sa Artsidyosesis sa Sugbo, ang pallium, nga usa ka panapton nga susama sa estola sa pari nga iyang isul-ob kon magsaulog siya sa Santos nga Misa sulod sa iyang teritoryo.

Ang seremonyas sa pagdawat niining simbolo sa iyang awtoridad isip labaw sa usa ka dakong jurisdiction sa Simbahan, ang usa ka artsdiyosesis o sede metropolitana, himoon didto sa St. Peter’s Basilica sa Roma unya sa Hunyo 29, 2011, Fiesta sa mga Apostoles Pedro ug Pablo.

Kining maong petsa sa pagpanghatag sa mga pallium ngadto sa mga bag-ong arsobispo tradisyon nga gisugdan sa panahon ni anhing Papa Juan Pablo II agig paghatag pagpahimug-at sa kahiusahan sa mga arsobispo ngadto sa Sto. Papa, nga mao ang ilang pangulo diha sa pagpangdumala ug pagpangalagad sa Simbahan.

Kining pallium isab-ong sa usa ka arsobispo nga bag-ong matudlo sa usa ka arstidyosesis. Kon siya arsobispo kanhi sa laing teritoryo ang iyang pallium alang sa maong jurisdiction dili magawi alang sa iyang bag-ong jurisdiction. Si Arsobispo Palma, pananglit, nakadawat og pallium sa dihang nahimo siyang arsobispo sa Palo, Leyte, apan karon kinahanglan nga modawat og bag-o nga pallium alang sa iyang bag-ong pangatunganan isip Arsobispo sa Sugbo.

Ang panapton niining pallium gikan sa balhibo sa karnero (wool)  ug sa pagsul-ob niini sa abaga sa arsobispo kini nagsimbolo sa Maayong Magbalantay nga nagpas-an sa iyang karnero, timaan sa katungdanan sa obispo ngadto sa iyang panon. Sumala pa sa tradisyon, sa gabii sa dili pa ang seremonyas sa paghatag niini sa usa ka arsobispo, ipahimutang kini sa altar sa lubnganan ni San Pedro ubos sa main altar sa St. Peter’s Basilica nga gikahulogan sa espirituhanong panagsuod sa arsobispo ngadto sa unang pangulo sa Simbahan, si San Pedro, ug sa iyang sumusunod,ang Sto. Papa, nga karon si Papa Benedicto XVI.