Samtang ang mga parokyano ug parokyana nga gikan sa nagkalainlaing parokya nangandam sa ilang byahe padulong sa Abellana Sports Complex, didto na ang atong mga youth volunteers pasado alas onse sa buntag, ingon sa gikasabutan. Puro mga excited kay sila ra ba kono ang mga ushers ug usherettes. Feel kaayo ang role ni Marie ug Jessa … Tooiink!

Human na sa paniudto nag anam-anam pagpangabot ang mga tawo. Busa ingon og nagkapuliki kono sila sa pag abi-abi sa mga motambong. Hawod kaayo silang naggiya sa mga tawo ngadto sa mga lugar diin sila mahimutang. Pero lingaw ug makahuloganon kaayo alang kanila nga nakaapil sa dakong pyesta. Super sa kalipay ang nabati nila!

Viva Cristo Rey! Mao kini ang singgit sa mga batan-on atol sa kasaulogan sa pyesta. Viva Cristo Rey! Panghinaut nga matinuod kini diha sa kinabuhi sa mga batan-on, nga si Cristo unta maoy mamahimong Hari sa ilang kasingkasing, taliwala niiining modernong panahon. Vivia Cristo Rey!!!

May banda nga gipahigayon sa ala una sa hapon. Mga ‘praise songs’ ang giawit alang sa kang Cristo’ng Hari. Gisundan dayon kini sa mga pag-ampo, nga giapilan sa mga tawo nga nakapuno gayud sa tibuok sports complex, sa may grand stand ug sa tibuok oval. Busa naglanog-lanog ang mga pangadye sa tanan nga nitambong didto!

Gisugdan ang Santos nga Misa insaktong alas cuatro. Gipangulohan kini sa atong Talahurong Kardinal Vidal, mga Obispo ug kaparian nga dul-an sa usa ka gatos nga nikonselebrada. Tungod niini ang entablado pwerting punoa. Ug ang tibuok palibot namuwak sa mga tawo nga andam na.

Ug kalit lang, (hapit na kadto panahon sa pagpangalawat), nikusog ang hangin ug gisundan og taligsik. Ug ang taligsik nahimong ‘murag unos’ apan walay makapugong sa mga tawo diha sa pagkalawat sa ‘Lawas ni Kristo.’ Bisan kon ang lugar gibistihan na sa kangi-ob tungod sa ulan ug dag-um ug sa bagang panganod, apan ang tanan andam gayud sa pagpadayon sa pagsaulog. Viva Cristo Rey! Viva!!!

Susama sa kadaghanan, humod usab kaayo ang atong mga batan-on. Apan murag maoy ampay nga mag ‘basa-basa sa ulan.’ Tiaw mo bay gusto kaayong maglakaw-lakaw sa oval, murag ‘wiper’ sa sakyanan ni Randy, hinay kono pero kanunay. Ngeehh!!

Sa dihang akong gipangutana kon nganong nag-ekis-ekis sila taliwala sa oval, tungod kono sa pagpangita kanako kon hain na ako nahimutang, kay dili na kono maila ang matag usa, murag piso nga nahumod nga giligo sa bata. Ang tuyo ra gyud nila, matud pang Tope ug Edna, mao ang pagsalbar sa akong cellphone, kay basin kuno’g nahumod na! Mas importante pa diay kanila ang cellphone kay kanako. Toink! Ehe he!

Gisunod dayon ang prosesyon sa dihang nilurang na ang uwan. Ug liboan sa mga tawo, may payong ug wala, nikuyog sa engrande nga prosesyon. Sakay sa maong ‘float’ ang Santisimo Sacramento, nga giludhan sa atong Kardinal Vidal ug sa nisakay uban kaniya. Ang solemning prosesyon gitapos didto sa Cathedral sa Sugbo, nga maoy nitak-op sa maong kasaulogan sa pyesta ni Cristo Rey. “Christus vincit, Christus regnat, Christus imperat.!!!”

Uban sa mga youth volunteers, kami didto sa sports complex nagpabilin, kay gikan sa pagka ‘usher ug usherettes,’ ang tanan nahimong ‘basorero ug basorera.’ He, he.. Dili oi! Nitabang lang kami sa pagpanghipos sa mga nahibiling butang, aron limpyo ang palibot, ingon kalimpyo panahon sa among pagpangabot.

Ug walay usa kanamo nga naluya. Gani naghinam-hinam hinoon kanus-a sugdan tungod sa mga plastic sa bottled water ug lata sa mga softdrinks aron ipatimbang kono nila. Busa naglumba-anay og punit sa matimbang aron kono may ikapa-load sa cellphone niadtong gabhiona. Ha ha ha!!! Salamat ngadto sa mga Youth District Leaders, nilang Pao, Marlito ug Charles nga maoy nangunay pagdala sa ilang mga batan-on.

Nanguli ang tanan nga malipayon kaayo, dili tungod kay may ikapatimbang nga plastic ug lata, kondili tungod sa higayon sa pagsimba ug pagdayeg sa atong Cristo’ng Hari. Ug tungod usab sa pagduyog sa tanang Katoliko diha sa pagpadayag sa atong bililhong Pagtoo! Amen! Amen!