Ang tuno ug uyok sa unang pagbasa karon mao ang naandang tema sa paglaum. Kining maong paglaum magagikan sa Dios. Ihatag ug ipatagamtam kini diha ug pinaagi sa kaliwatan ug laray ni David (v25). Ug kini tungod sa walay kinutubang kasabutan tali sa Dios ug sa Iyang piniling pinalangga nga si David.

Ang katumanan niining maong paglaum nagsukad sa kalig-on sa panaad ug pagkamatinud-anon sa Dios. Ang ngalan nga DAVID nagkahulogan man og “pinalangga’’ o “pinalabi’’. Ug mao kini ang hinungdan sa kalig-on sa baruganan ug sa pagsalig ni propeta Jeremias diha sa iyang pagsibya sa ingon ug maong paglaum sa kaluwasan.

Niining maong paglaum nga nagsukad sa katarong ug kaangayan sa Dios magsukad ug magsugod ang katarungan sa mga magtutuo, ang pagpakigbisog batok sa kadautan, ang pagpihig sa kaayohan ug ang pag-ugmad sa kadait ug kalinaw. Ug kining tanan pangunahan o pagapangulohan sa maong kaliwat ni David nga gitagana sa maong diosnon ug balaan nga katuyoan.

Ang pagtawag ug paghingalan sa siyudad isip “Ang-Ginoo-Maoy-Atong-Kaluwasan’’ usa ka tataw ug gamhanang kapadayagnan ug pagpahayag sa maong laraw ug buhat sa Dios alang sa Iyang pinili ug pinalanggang katawhan. Nga sa kang David, ug sa maong gipanagna ug gikatakda, nga kaliwat ang tanang katawhan mamahimong katarongan ug mga himan sa kaangayan sa Dios. Ug dinhi manukad ang maong pagkahilambigit sa matag magtutuo sa dinamismo ug bul-og sa laraw sa kaluwasan.

Sa samang paagi, dinhi usab magsukad ug magsugod ang lintunganay nga kahulogan ug ang ato mismong tinagsa ug tiningob nga kaakohan diha sa atong pagpangandam niining Panahon sa Adbiyento.

Nga ang atong pagpangandam sa Ikaduhang Pagbalik sa Ginoo, ang Dinihogang Manluluwas o Mesiyas, dili lamang pagpa-abot kondili pagkab-ot usab sa katumanan ug mithi sa kaluwasan – ang pagbuhi sa maong paglaum dinhi sa atong taliwala ug ang pagsinati ug pagtugkad sa lawom nga kahulogan sa kaluwasan dinhi sa atong kinabuhing kristohanon. Kay ang pagkab-ot mao man ang pagtuman, pagbuhat ug pagtubag sa hagit sa kaluwasan, kay ania man usab kanato ang susi sa katumanan niining maong panaad sa kaluwasan diha ug pinaagi sa atong mga maayong buhat ug panig-ingnan.

Sa katapusan angay natong mahibaloan ug maamgohan nga ang kaluwasan paga-ugmaron gayod diha ug pinaagi sa buhat ug tarong nga kinabuhi. Kay ang katumanan walay lain kondili ang paglihok ug pagpatigayon. Ang panaad matuman man lamang kon atong tubagon ug lihukon sumala sa gitakdang katuyoan ug tumong sa Dios alang kanatong Iyang mga katawhang tinubos: ang kinabuhing matarong.

Hinaut pa unta!