Kinaadman 7:7-11
‘’Kinaadman: Tinuod nga Bahandi’’

Ang atong unang pagbasa karong Domingoha nagbalik-lantaw sa labing mabulukon ug talagsaong kasinatian sa kinabuhi ni Haring Solomon. Mao kini ang buot ipasabot ug gipasunding sa giingon sa v7 nga PAG-AMPO.

Kining maong “pag-ampo” makaplagan diha sa 1 Mga Hari 3. Dinhi gipangayo ni Haring Solomon ang KINAADMAN labaw sa tanang butang nga mahimo niyang pangayuon ug ihatag kaniya sa Labawng Makagagahum.

Karon niining maong masauluganon nga pagpahayag, giyagyag ni Haring Solomon ang tanan mahitungod sa Kinaadman. Nga kini labaw pa sa mga bahandi, kay diha kaniya magagikan ang tanan. Ug sumala sa kasinatian ni Haring Solomon, sa iyang pagpangayo sa Kinaadman aron iyang masugakod ug masagubang ang pagpangulo sa usa ka bagang katawhan, gihatag usab ang wala niya pangayoa ni ang pagpangandoy sa kalaglagan sa iyang mga kaaway.

Nahimong susi ang Kinaadman sa tanang butang. Gilarawan pinaagi niining maong susi ang tuboran sa tanang bahandi sa tibuok kalibutan. Ug diha sa sabakan sa Kinaadman, makakaplag og kahulogan ug bili ang tanan-tanang butang.

Ug diha kang Jesus, ang Kinaadman sa Dios, makakaplag og tim-os ug tiunay nga kahulogan ang tanan.
Sa santos nga ebanghelyo karong Domingoha, Markos 10:17-30, gipahimug-atan ni Jesus ang pagtulon-an mahitungod sa pagbaton og bahandi diha sa “pagbaligya ug paghatag sa halin niini ngadto sa mga kabus”. Nga aduna diay iyang kaugalingon mas labaw pa nga bili ang maong mga bahandi ug kabtangan kon kini gamiton alang sa kaayohan, kaugmaran ug kaayohan sa mga kabus.

Kining maong pagtulon-an adunay kalambigitan sa mismong panig-ingnan ni Jesus sa Iyang Misteryo Paskwal diha sa paghabwa Niya sa Iyang kaugalingon ug paghukas Niya sa Iyang pagka-Dios (tan-awa ang Filipos 2:6-11) aron pagpakigsalo kanato sa atong kakabus aron himuon kita Niya nga mga adunahan ug manununod sa mga langitnong bahandi ug sa kinabuhing dayon.

Pinaagi niining maong panig-ingnan ni Jesus gidapit kita, ug sama sa dato diha sa ebanghelyo karon, kita gihagit usab sa paghabwa sa atong tagsa-tagsa ka mga kaugalingon aron mati-unay ang atong pagka-manggihatagon. Kay ang pagka-manggihatagon bunga ug bugti sa tinuod gayod nga pagsabut nga ang tanang aduna kita iya sa Dios. Ug nga kita, sama kang Haring Solomon, mga piniyalan man lamang!!!

Busa sa atong pagpadayon sa pagpuyo ug pagpaningkamot sa pagkat-on ug pagsunod sa kabubut-on sa Dios alang kanato, hinaut unta nga batonan nato ang kinaiya sa pagka-bukas diha sa pagka-manggihatagon aron motubo, molipang, molambo ug mamunga kita diha sa grasya ug sa kabahandi-anon sa Kinaadman sa Dios nga mao mismoy mobisibis kanatong Iyang mga anak ug piniyalan sa tanang bahandi sa kaluwasan aron mamahimo kitang adunahan sa mga hiyas ug bahandi diha ug pinaagi ni Cristo nga atong Ginoo. Amen!